最近有好幾個同事和醫學院同學紛紛去私家。
其實的確好可惜。好似我同學W，一位肝膽胰外科醫生，佢醫學院畢業後好_辛苦咁用咗10幾年時間培訓，終於捱到可以獨立做肝膽胰手術，而且技術了得。明明可以留喺公立服務唔少肝癌病人，但係佢寧願選擇出去私家做普通外科症。醫管局每年都損失好多有經驗又有實力嘅醫生護士，唔係你個垃圾政府突然掉幾億出嚟就可以補償，又或者填返個人頭就當無事。
可能好多醫生護士朋友，曾幾何時都好似我咁天真硬膠，以為係公立醫院可以真正幫到人，去私家都係搵錢，埋沒自己放棄理想。
咁諗真心on9。
雖然有一點係真，就係做公立可以唔使考慮【錢】，只係按照病人實質需要去做檢查同治療。
但係公立醫院確實會將你嘅醫䕶熱誠和同理心逐漸消磨，最終迫使你離開。
一年復一年，公立士氣每況愈下。政府對醫療欠缺長遠規劃，大家係度困獸鬥，有硬件冇軟件，有加床冇加人，病房急症室淪陷，高層就行個圈做show然後加薪攞bonus。管理層只着重門面條數同埋做醫院認證，但從來唔考慮病人服務嘅質素。公立醫院之所以今日仲捱得住，完全係因為利用緊一班醫護人員嘅良心去死撐。
係你上面嘅管理層，顧問醫生，病房經理，成日喺度指指點點又唔落手做，淨係識開會廢噏，遊手好閑，但係人工就多過你多多聲。仲有，其實醫管局養唔少懶人，一班出去可能撈唔掂嘅人。你唔甘心，因為明明你辛苦過佢地，但係冇一分耕耘一分收穫。
好多資源嘅限制，令你明明想幫病人做好啲，但係無奈地從你手上一直俾緊suboptimal care。問心嗰句，久而久之真係會變得麻木同求其。
返工對住好多蠻不講理嘅病人同家屬。當然呢啲人私家都會有，但我認我膚淺。假若我係私家收你咁多錢，我又有乜所謂，我可以叫你做多啲檢查，又或者我可以耍走你，橫掂係自由市場。你俾咁多錢，我又有多啲時間，我態度實好啲㗎。
某D專科外面世界可以搵多好多錢，又可以工時好啲，好似我同學W咁，其實仲有咩理由要留係公立？
現實係殘酷嘅。我唔知我仲捱到幾耐，我都差唔多要搵定私家好路數。
Search